माननीय प्रदेश प्रमुख श्री उमाकान्त झाज्यूले शुभ दीपावली २०७६, नेपाल संवत् ११४० तथा छठ पर्वको पूर्व सन्ध्यामा दिनुभएकाे शुभकामना सन्देश


शुभ दीपावली २०७६‚ नेपाल सम्वत् ११४० तथा छठ पर्वको पावन अवसरमा स्वदेश तथा विदेशमा रहनुभएका सबै नेपाली दाजुभाइ तथा दिदीबहिनीहरुमा सुख, शान्ति, समृद्धि, आपसी सद्‌भाव, एकता र उत्तरोत्तर प्रगतिको लागि हार्दिक मंगलमय शुभकामना व्यक्त गर्दछु ।

मानव सभ्यताको आदिकाल देखि नै विभिन्न समुदायहरुले सामूहिक रुपमा अवलम्वन  गर्दै आएका प्रचलनहरुले  आपसमा अपनत्व र सद्‍भावको भावनामा अभिवृद्दि गर्न महत्वपूर्ण भूमिका खेल्दै आइरहेका छन् । निरन्तर अभ्यास गर्दै जाँदा ती प्रचलनहरु नै सामाजिक पहिचानको रुपमा स्थापित भै  साँस्कृतिक वैभवको रुपमा रहेका हुन्छन् । विभिन्न साँस्कृतिक विविधताले भरिपूर्ण रहेको नेपाली समाजमा सबै समुदायहरु आ-आफ्ना संस्कृतिहरुमा अत्यन्त गौरव गर्दै तिनको निरन्तर अवलम्वन, अभ्यास र संरक्षणप्रति पनि उत्तिकै सचेत र जिम्मेवार रहँदै आएका छन् ।

घर घरमा दीपावली सहित यमपञ्चक अवधिमा काग, कुकुर, गाई, धनधान्यकी देवी लक्ष्मीको पूजा, गोबर्धन पूजा, म्हःपूजा गरी तथा दिदि बहिनीहरुले आ-आफ्ना दाजुभाईहरुलाई टीका लगाई हर्षोल्लासका साथ मनाइने चाड तिहारले सम्पूर्ण नेपालीहरूको मुहारमा उज्यालोपन ल्याउन सकोस् । नेपाल सम्वत्‌ ११४० ले सबै नेपालीहरुमा सहिष्णुता, सामाजिक एकता, भाइचारा र आपसी सद्‌भाव अभिवृद्धि गर्ने कार्यमा अझ बढी प्रेरणा प्रदान गरोस् । साथै पारिवारिक कल्याण तथा मनोकामना पूरा हुने विश्वासका साथ छठी माता र सूर्य देवताको पूजा आराधना गरी एक आपसमा शुभकामना आदान प्रादन गर्दै मनाइने छठ पर्व २०७६ ले सबै नेपालीमा राष्ट्रिय एकता, मेलमिलाप र आपसी सद्‍भाव कायम गर्न मद्दत पुर्‍याउन सकोस् ।

अन्त्यमा, शुभ दीपावली २०७६‚ नेपाल सम्वत् ११४० तथा छठ पर्वले उत्साह र उमङ्गका साथ  खुशीको संचार गर्दै सम्पूर्ण नेपालीहरुमा  एकता, आपसी सद्‌भाव र समृद्धिको सन्देश दिन सकोस् भन्‍ने मंगलमय शुभकामना व्यक्त गर्दछु ।

मितिः २०७६ कार्तिक ८ गते शुक्रबार ।

(उमाकान्त झा)
प्रदेश प्रमुख

बिज्ञप्ति तथा सूचना

विज्ञप्ति

बिज्ञप्ति

विज्ञप्ति

विज्ञप्ति